夏佳理噚日好事成雙，佢有份嘅團體馬「海中寶」順利大熱贏出，佢以往匹名駒「翠河」又被製成標本，噚日開始喺沙田馬場展覽。
「翠河」曾貴為香港賽馬史上首匹三冠馬王，夏佳理話當年「翠河」退役，運往澳洲頤養天年後，自己平均每三年會到澳洲探佢兩次，每次「翠河」都會認得佢，人馬之間有份深厚感情。至上年3月「翠河」睡夢中辭世，自己就立即同馬會聯絡製成標本，費用由馬會支付。標本噚日起至本月26日，喺沙田馬場會員席展覽，跟住轉到公眾席展覽至明年4月，之後就送往賽馬博物館。
另外，一年一度儼如經濟寒暑表嘅香港國際馬匹拍賣會，將於本周六喺沙田馬場馬匹亮相圈舉行，預期因經濟暢旺，有資格競投馬匹嘅馬主勢必出價踴躍，30匹拍賣馬嘅成交價有望創新高。養馬逾10年嘅梁廷鏘與寇鴻萍夫婦，上年度嘅馬匹拍賣會斥資約355萬元，購入兩匹馬「衝鋒槍」同「顯威威」，其中只出賽六次嘅「衝鋒槍」已贏得兩次頭馬，未夠一年已累積89萬蚊獎金，係上年度贏得最多獎金嘅拍賣馬。
