馮仁昭四圍超：
陳國坤截拳道勝周杰倫　搶演李小龍

由中央台製作嘅40集長劇《李小龍傳》喺出年2月開拍，今日喺北京舉行記者會。雖然李小龍超級fans周杰倫早前話唔收酬勞都肯制，希望可以爭做男主角，但李小龍遺孀蓮達（Linda）同乖女李香凝商議後，決定由喺周星馳主演嘅電影《少林足球》裏面以李小龍扮相而為人熟識嘅陳國坤扮李小龍。

拜羅禮士愛徒為師

據知花名小龍嘅陳國坤為咗爭贏周杰倫，費盡心思，大半年前已經開始學習截拳道，仲拜曾經同李小龍合作拍攝《猛龍過江》嘅羅禮士個徒弟Sam為師，仲會拍低練武嘅情況，交畀蓮達母女等佢哋提供意見。咁仲唔止，陳國坤又多次同蓮達及《李小龍傳》一劇嘅監製會面，了解角色，咁落力，難怪各方面都對佢極為滿意，今次周杰倫應該輸得心服口服。