以為終於要爆煲了，結果呢？冇事不特止，仲好似因禍得福。
上周韋斯咸主場贏波，但阿根廷曳仔泰維斯就因為被換出唔高興，竟然憤而離場直接返屋企。賽後領隊柏度表示，唔可以接受呢啲咁離譜嘅行為，仲話一定會追究。
罰着巴西波衫夠絕
人人睇死阿根廷人喺韋斯咸，仲要搞鋪咁嘅嘢，睇嚟呢次都一定吵大鑊，家變嘞。
點不知，泰維斯第二朝歸隊，竟然當大家以為佢一定扮晒嘢，博唔撈之際，佢突然大呼sorry，仲話當時一行出場就後悔，認真唔好意思。呢位臭馬難得擺出「老細，畀次機會」嘅世界仔態度，大家亦即刻受落。
不過就依然要罰，罰也就由球員投票，結果罰錢冇反應、罰執波唔特別、罰佢着巴西波衫練波啦，竟然全部職球員舉手支持！阿根廷臭馬要着死敵巴西波衫，確屬小懲大戒，泰維斯已經話比死更難受，咁都要罰㗎，除非下場入3球啦！
一個計時炸彈，就咁淋熄咗，度呢條橋嘅仁兄的確有計。
馬啓仁
愈講愈有味道，卻堅持「鎚仔」先係正路。