上周曼聯大戰車路士，和氣收場，猶記得仲聲大大話曼聯會輸得好慘，小弟就真係輸得好慘啦！今日只求大家給我一次機會，我預計曼聯會失分！
講番今晚啲波，曼聯真係會失分，大家要信我，因為佢哋嘅對手係「海鮮波」米杜士堡。大家信唔信足球係格食格，保頓食住阿仙奴，利物浦食住車仔，呢期就車仔食住巴塞（正確講法係輪流食），至於曼聯就俾米堡食住，紅魔試過輸1:4㖭！米堡近6次主場迎「紅魔」3勝3負，成績唔錯，今晚有力迫和曼聯！
阿仙奴反底趁「熱」食
至於阿仙奴，我深信佢哋可以終止兩連敗，亨利、路斯基休息了一段時間，對住富咸，唔會有過大期望。不過調整後，返到主場應該有貨交，對住熱刺，不足為懼！
最後，深受歐冠盃出線困擾嘅巴塞，將會作客利雲特，小勝對手無問題。無論贏波、輸波，朗拿甸奴係唯一一個都會笑嘅球員，憑呢樣快樂足球，已經夠贏啦，加上作客有成1.45倍，幾吸引！
（11月賺蝕：-27%）
周鵬
商業1台《球迷集中贏》主持
電郵：[email protected]