劉嘉玲和古天樂等前晚盛裝出席尖沙嘴JustCavalli時裝騷，嘉玲風騷談及失落金馬獎的感受，她揚言只是天時地利人和欠其一，從沒有懷疑自己的實力。她又透露在上海夜會中田英壽兼錫面，純粹回禮對方錫錫。
意國名牌JustCavalli前晚慶祝尖沙嘴Gateway新店開幕，傍晚先在3,000呎新店舉行07春夏時裝騷，由名模熊黛林、陳嘉容和劉丹等示範新裝，晚上在Aqua舉行大型派對，出席嘉賓包括劉嘉玲、古天樂、馬詩慧和任達華琦琦等。
協助王菲籌款
劉嘉玲一身型格打扮風騷到場，她透露體重已回升到正常水平，問到再次失落金馬獎，她大方說：「唔使安慰我喇，得獎嘅事係要天時地利人和，當中梁朝偉咪有齊以上條件，而多數人係欠缺其一，我就係呢多數人之一，我從來都冇懷疑過自己嘅實力，我拍戲唔係為得獎。」
有報道指嘉玲包定場慶功？她說：「無論點，我哋都會慶祝，就算之前張震冇得參加，我哋都會慶祝。」有傳媒影到嘉玲與中田英壽在上海夜會，指偉仔嬲爆，嘉玲聞言哈哈大笑：「梁朝偉嬲中田？真係笑死我，若果覺得張相有問題，就係你哋有問題啦！」
問嘉玲與中田英壽為何親密到錫面？她繼續笑不攏嘴說：「哈哈，佢錫我，我咪錫番佢囉！我識得佢㗎，佢係一個好健康嘅男仔，當時party咁多人，都冇乜私隱。」
嘉玲又透露正協助王菲的嫣然天使基金慈善晚宴呼朋喚友出席，更笑言到時要上台表演唱歌，由王菲幕後代唱。
古仔忌穿皮草
談到時裝經，古天樂則謂最愛上網買衫，他說：「上網買方便啲，不過好多時買咗着唔到，十件有八件都係唔啱身，得個睇字，惟有將啲着唔到嘅衫捐番出嚟。」他又謂不抗拒穿花花綠綠的服裝，但不能接受皮草。
採訪：GeneNg
攝影：RickyIp
