大昌微線（567）係今年升幅驚人嘅股票之一，日前公布截至9月底止半年業績，錄得純利9768萬元，較上年同期大幅增長279%，每股盈利0.2052元，除盈利急升之外，營業額都升逾8成，至4.59億元。
噚日大昌微線股價高開，曾升至3.60元，其後沽壓湧現，急挫逾15%，收2.93元，頗有好消息出貨味道。假設下半年度公司盈利同上半年一樣，每股盈利約0.41元，PE約7倍，都唔算太貴，問題係呢個高增長業績能唔能夠持續，以及行業周期係點。
呢間公司亦有建滔積層板（1888）影子股概念，不過暫時仲未見炒味，其他影子股如華翔微電（1195）、瀚宇博德（667）等都冇乜勢，只係得近日獲建滔（148）大手增持嘅至卓國際（2323）有啲升幅。
另外，股價跌足1年兼屢創新低嘅奕達（2662）自低位1.02元反彈，呢間做印刷線路板（PCB）及電子服務供應商的「前度」基金愛股，今年3月曾升上3.7元以上，不過見頂之後，一浪低於一浪係咁跌，沿途撈底者，只能歎句倒楣。
客源集中毛利低
奕達月前公布6月底止全年業績，純利1.6億銀，每股盈利0.19元，現價往績PE約10倍，不過要留意呢間公司9成收入來自3個大客，且採購及組裝業務只係低技術、低門檻及低毛利生意，除非公司轉型高端業務，否則欠缺前景之下，唔易有基金睇得上眼。
歐陽風