今年入伙嘅新樓，有唔少人因為入伙前走唔切，又唔想上會，結果以為撻定走人就冇事，點知𠵱家陸續開始畀發展商追番重售後嘅差價。好似網友peter789101就喺《香港討論區》上面SOS求救。eddiesoosk話：「一般樓宇買賣合約是有這個條款，這就是買樓花其中一個風險。你可以試試和發展商商討解決方法，一般情況他們都不想有太多撻定而影響他們樓盤的銷售，試一試吧！」
開有限公司買樓
dbp教路：「如果差價多（例如100萬以上）而手頭再冇資產，便破產好了。如果差價少，或手上還有點資產，便問熟人借定錢補差價，自己割價止蝕好了，等發展商收樓再賣補差價，分分鐘補多好多。」
龍明無幽郎就話：「一般咁嘅情況就要睇係邊間發展商喇，若果係長實，咁佢一定追……」cccl提醒所有網友：「唔買新樓冇咁易中招。」
睇嚟呢位peter789101網友係用私人名買樓。有業內人士話，如果真係想炒樓，不妨使多少少錢，開間空殼有限公司嚟買，咁就算有乜冬瓜豆腐，撻定走人，再將公司清盤，咁點追都追唔到自己啦。當然，如果你當初係想買樓自住，但因為經濟環境發生變化而被迫撻定嘅話，就惟有講句「Godblessyou」喇。
講多句，啱啱開始收樓入伙嘅大角嘴一號銀海同將軍澳都會駅，大把人舊年飛撲入市高價買樓博炒，𠵱家聽講有唔少買家諗住就算銀行估到價都唔上會，皆因層樓賬面就算唔負資產都已蝕好多，要守又唔知守到幾時。如果佢哋諗住撻定，咁就要睇清楚兩個盤嘅發展商係乜水喇──一號銀海係信和，都會駅係長實呀！