係反町隆史的《BeachBoy》叫人印象太深，又或者近排人氣反彈的木村拓哉以前滑水Look亦深入潮人心，從來只以為日本仔瘋狂愛滑水，但原來連潛水活動亦甚Like；今年力谷宣傳打入日本市場的BALLWatch，今勻遠赴東京，找來深潛世界紀錄保持者GuillaumeNery在東京即席示範深潛。而原來潛水已係東京潮人一族激新玩意，連帶潛水錶亦成運動錶類最潮錶款。
記者：吳小明
攝影：K.Sakuyama（潛水）、BeckyYee（訪問）、陳盛臣（產品）
創世界紀錄曾經失手休克
從來去東京只曉Shopping，乜有地方潛水嘅咩？藉今趟BALLWatch潛水之旅，遠赴距離東京都兩小時路程的Izu小島，一會剛於9月締造全新徒潛世界紀錄保持者的Nery，原來跟Nery一齊玩水的仲有成隊東京潛水愛好者，大嗱嗱70多人有FreeDiver、也有孭筒潛水嘅，陣容咁鼎盛，先知東京在買買買以外，別有一片天。
Nery今趟破完紀錄來瀛，當然抱住輕鬆心情露兩手，陸上帶埋女友周圍玩同食，海中則大玩花式動作，筆者無能跟Nery落水，但單睇相都足以目瞪口呆。今年年方24的Nery生於法國南部、在面對地中海的小鎮尼斯長大；才20歲時，已以下潛至87米的深度，成為最年輕的世界紀錄保持者，到2004年，再以達到96米深度的成績重奪該界別世界冠軍的名銜。今年則剛於9月6日於法國尼斯，成功以109米的深度刷新徒手潛水「恒定重量潛水」界別的世界紀錄。
攞咗幾次世界冠軍，今勻連世界紀錄都創埋，徒潛對Nery來講係咪易過食生菜呢？又唔係噃。佢話：「其實在試潛過程中，試過幾次失敗，去唔到目標嘅水深，兼夾有次仲失手，上水嗰刻失去知覺休克達3分鐘，諗起都一額汗。不過我相信運動員天生就有一股鬥志，唞咗3日後再嚟過，點知嗰次就得咗。」
速睇破紀錄裝備
Nery破世界紀錄的一刻，戴住的就是這枚EngineerMasterIIDiver潛水錶。威水功能包括：旋轉計時圈上鑲嵌41顆鎮牌標記自體發光微型氣燈，光足25年，幾黑暗嘅底都睇到時間。計時上首15分鐘以每分鐘為一刻度外，更配以或綠或橙，提高取讀搶眼度。為進一步鞏固其超卓的防水性能，兩個錶冠都採用了紅色的防水膠圈，當錶冠未完全鎖上，露出的紅色防水膠圈便可提醒佩戴者。防水深度則進一步提升至300米，備有膠帶及不銹鋼帶選擇。
日模用家講用後感
日模兼DJ：鍾意佢夠光！
「夠光！」模特兒MayumiKai本身既是日模，又是DJ，她揀BALLWatch正是因為其超光的微型氣燈刻度，打碟時黑麻麻都能睇清楚時間，其他牌子真係無佢咁光㗎。
流浪一年，夠準！
「好準！」模特兒KatherineEarnshraw試過流浪全世界一年，走過印度、埃及、尼泊爾等不毛之地，伴隨佢上路的就是這枚BALL，實際經驗話畀佢知BALL的確好準。
日本傳媒點睇？
今勻旅程同場加映車輪走訪多本潮誌主編、潮人模特，雖則話係大會安排，但個個樂意受訪，可見波爾錶在日發展成績斐然，唔信？幾本男潮書如《Begin》、《Brutus》等都極有江湖地位，仲出動到總編或資深編輯會見我呢亭「蠅頭小記」，就知筆者唔係老吹㗎。
《WatchBegin》老總植田：
追溯BALLWatch乃美國鐵路官方時計這一頁歷史，當中Trainmaster這一系列當然最有追捧價值，新推的115周年紀念限量版，應該有價有市。
《Begin》老總兒島：
形象專業、有獨門秘技、再加埋平易近人中檔價錢，基本上潮人及專業錶迷都能一網打盡。
《Brutus》編輯江田行宏：
作為入門錶，BALLWatch的確是不二選擇，但要邁進更高層次，成為殿堂級數，則尚需一個深入民心的宣傳策略，令到錶迷一致認同先得。
《Popeye》副編集長森部嘉一：
日本後生仔購買力驚人，凡係潮流新貴一律有買錯無放過，舉凡雜誌推介或明星做生招牌，都會令品牌容易打入市場，建議波爾錶不妨考慮起用重量級明星代言人。
同場加映新錶晒冷
TrainmasterHeritage限量天文台紀念錶，紀念品牌創立115周年，共有黃金、玫瑰金和白金3種選擇，各全球限量115枚。$43,800
TrainmasterPowerGlow有全新動能儲存顯示，當機芯完全上鏈，佩戴者會看到左邊帶有一條光柱。而當動能消耗，黃色光柱會隨着紅光而慢慢消失，只要再轉動錶冠為機芯上鏈便可讓光芒重現。$14,180
波爾錶女裝錶較少，女裝鑽錶更少，這枚ConductorTranscendent是難得一枚的佳作。鑲有78顆VVS級鑽石（共0.45卡），酒桶形錶殼十分典雅。$19,800
查詢：28588268