跑馬有所謂「步步贏、一步輸」，兩匹馬拼鬥，一方奮力佔先，沿途壓住對手，偏偏埋門剎那，在馬頭「岌」上「岌」落之際，竟被弱勢一方先觸線，這樣輸掉最令人心痛肉赤。周三跑完夜馬，仍趕得上睇亞運足球分組賽，香港對印度的下半場，技巧組織即使無甚看頭，但港人捧港隊，自有一份投入感。
總算福大命大
明明香港攻勢較多，可惜卻久攻不下，完場前1分鐘解圍撻Q，變成set波畀印度隊射門，那種心痛程度，一如影相僅敗輸馬。
好在其實未到終點，補時初段心急亂踢一輪高空波後，終於冷靜下來，組織攻勢追回1球。縱使打和令出線機會減低，但總好過輸吧，而且如果相信運氣手風，香港正是福大命大，才能追和呢。
港印足球打成平手，賽馬水準則完全冇得揮，約12年前有匹印度馬王來香港服役，結果只贏了兩場普通讓賽。下星期是香港國際賽事周，歐、美、澳、日的一級馬已陸續抵達，工作密密麻麻，恐怕冇得睇波了。
張美德
記者出身的著名馬評人，現職馬會節目主持人。