一講完「人人看好」，股市即刻跌咗成五百六十四點，逾2.9%，死未？寫股票稿甚艱難，要今晚寫，聽朝刊出，先至唔會過時。十一月二十八日股市大跌，有人歸咎華爾街杜指、納指拖累，有人話本港賣地成績唔算太好，當然更有瑞銀出咗報告唱淡中資銀行股啦。中資銀行股本是長期投資對象，近月突然變成二三線股咁當炒，危機早伏，不過大家趁高興，唔多覺而已，以後大家或者應該多睇基本因素，資金流向只合快上車快落車之用。
廣播道一號賣到十九億四千萬元，九千八百幾蚊（樓面價）一呎，三年後加上利息，建築成本與兩成幾利潤，最平要賣到一萬五千蚊一呎，咁嘅價錢，由大好友信和買入，好啱聽，信和素來都鍾意高價入貨㗎啦，勾地嘅嘉華，唔夠信和勇猛嘅。最弊「信和」被市場視為地產指南針，佢以高價買地，會唔會表示地價見頂呀？馬鞍山幅地皮大好多，望中文大學及吐露港，但勾塊地出嚟嘅嘉華，照樣唔夠長實出手高，以三十二點四億元成交，樓面呎價三千六百幾，不過不失，屬事前估計之中下限，兩幅地，一幅賣得好貴，一幅賣得平平，顯示豪宅地皮最吃香，畢竟馬鞍山同廣播道一號係冇得比嘅。
測量專家C一早預測廣播道值十六億，馬鞍山值四十億，加埋庫房可收五十六億，原來估唔中，大概佢都要承認，樓價兩極化嘅程度，比想像中更嚴重，有錢人情願以一萬五千蚊一呎住廣播道一號，都唔肯以五千五百蚊一呎住馬鞍山。老友記T一世人夢想住廣播道一號，𠵱家睇見呢個價錢，冇乜希望噃，退休後去馬鞍山睇海景啦。
三年後嘅樓價，邊有人估得中，有早知就冇窮人，住得起萬五蚊一呎豪宅嘅，只有兩類人，一類係做生意嘅老闆，一類係可以攞到一百個月花紅嘅投資銀行僱員，打工仔即使係老友記T咁嘅級數，年薪百零萬，唔會有資格，所以我哋一早死咗條心，可以瞓得安樂啲。