唔知大家幾耐冇去過大尾篤？3年、5年、10幾年？身邊朋友答案不盡相同，總之好耐冇去過；最近嗰邊出現咗個小泰國，泰式篤篤、街頭小販車、連木製河艇都有架！講緊係新開張嘅泰太廚房！起初都以為「裝」兇作勢、玩吓Gimmick，點知入到去真係清一色「泰國人」餐館；既然已經將「小泰國」搬咗過嚟，以後想食好嘢又點使搭飛機咁麻煩呢？
記者：朱崇德
攝影：周旭文
1間餐廳3種格調
這邊廂政府剛落實，在大尾篤興建全港首個「芭堤雅式」人造沙灘，預計08年動工，2年後完成；但估唔到已經有人搶先將成個「小泰國」搬咗過嚟做餐廳！
泰太廚房的第一個惹人注目點，都可算係放在門口的「泰式4寶」食肆兼擺設，但當你正式坐低，才被他的「三進設計」、3種不同風格所迷倒！前舖是開放式廚房加露天茶座，面向水上活動中心是一潭波平如鏡的湖景，遠眺林木如山、背靠是山巒起伏的八仙嶺，試問香港幾處有如斯勝景；中舖是夾雜在冷熱之間，粉牆大膽以紅、藍相間、滿室泰式香薰，再加木傢俬、泰國傳統掛畫作點綴，HomeFeel味道出晒嚟！後舖是簡單園林景，矚目點是兩個泰式的帳篷茶座，難得是一片閒話家常的寧靜！
泰式4寶風味
1.篤篤（曼谷的士）
受制交通條例，入口香港要拆引擎，所以唔郁得，不過無論食客定行過旅客，都好鍾意坐上去影相留念。
2.舊木樁
初見！艇後因乜有一條條木柱，原來竟是支撐泰國河屋的「大木樁」；木身侵蝕成蜂巢狀，型仔非常。
3.小販車
泰國地道街頭小販車，搬到過嚟跟足「原著」作為河粉車，食客睇住嚟淥河粉，個個大叫過癮。
4.河艇
窄窄的河艇，在泰國除可代步之用外，仲會用作賣海鮮、鮮花或河上小販之用，現在餐廳改之為自助海鮮Bar。
經驗泰廚地道風味
點菜時發覺，餐廳上下竟是清一色的泰國人！起初叫佢埋嚟，都有啲心驚驚，一開口！竟然個個操流利廣東話，馬上定晒！靚女侍應話：「我哋主力Sell純泰國風味！總廚Jumphon先生，可是有40年經驗，喺泰國正統學泰菜；而且我哋好多材料同香料，都係特意從泰國進口！」不過呢度始終係香港，泰菜本質酸辣味道較重，香港人未必能接受！如果想一試泰菜「真章」，不妨同侍應道明來意！另外喺度一提各位女讀者，所有女客光顧，都有特色泰國耳環送贈；如果碰啱生日正日嚟食飯，餐廳仲預備咗泰國手雕番梘「花樽」畀你做禮物，都值成$100個，真係咪同老闆客氣呀！
咖喱燒士兵雞$98
初睇士兵呢個名，仲以為甚麼行軍菜式，泰國亞廚好搞笑話由Spring硬譯過嚟（即係咖喱燒春雞）！一刀切下，咖喱汁有如噴泉傾瀉而出，「咖喱料藏在雞肚內，爐火一燒，咖喱香料之美味完全迫晒入雞肉，外脆內香！」另外一提大家，呢度嘅白飯唔使錢任裝，配汁、配雞同食，咁先至最正。
泰式燒乳豬 $280/1日前預訂
食呢隻泰式燒乳豬，一定要享受整個過程！BB豬先以泰國紅酒、蒜粒、芫荽頭、生抽及白醋入味醃半日，再吊亁水半日才可下火燒；大廚會當住你面燒，整個燒豬過程幾近2個鐘，慢火細烤，焦肉之香於你口鼻充塞；叫來一支紅酒，看着乳豬皮身由白轉紅，由紅變脆；有時等食，都可以係一種享受！
火燄山燒魚 $128
大烏頭先以大火炸香，再加人參薑、辣椒亁、蝦膏等泰式香料來燜，下面爐火一燒，汁醬收緊，酸辣口感逐步升溫。
辣酒煮鮑魚仔 $88
靈感由港式「辣酒煮花螺」而嚟！改用鮑魚仔，一來為咗易食啲，更重要係鮮香好多！
蟹肉炒飯 $62
蟹肉炒飯好味在原隻花蟹拆肉拆膏炒飯，面灑蟹子、再包蕉葉，東南亞風味出晒嚟！更愛佢入口唔油膩。
泰北酸辣羊腩湯 $68
泰北傳統菜，以香荽、辣椒、香葉等炮製出酸辣感：「泰北人多配豬雜同食，不過改以現在時令的羊腩代替！」
睇路搵食
泰太廚房（29482800）
地址︰大埔大美督村地段28
710及712地舖
座位︰約120個
平均消費：$50-$100
交通︰大埔墟火車站側，轉20C專線小巴，直達大美督巴士總站斜對面（村公所側）
大尾篤有乜玩？
撐艇仔：基本$20/1小時，講到抵玩，如果有幾個人輪住玩，都係租$80/1日好啲。
釣魚：魚具可以去到先買，一般手絲同魚餌都可以現成在士多買到，都只係$30的遊戲。
踩單車：一般雙人車大概租$80/1日，普通單車就$30-$40/1日有交易。
BBQ：背山面海嘅燒烤場，邊到搵？燒烤架生、食物，都係搵士多搞掂；平均1人消費，都上$50-$80！假日超爆，有心玩？閒日嚟包有海景靚位。