王晶與緋聞女友陳煒合演的電影《提防老千》前晚舉行首映禮，兩人在戲中有不少大膽親熱鏡頭，反而男主角張家輝的激情戲卻望塵莫及，難怪他忍不住踢爆王晶經常臨場加戲與陳煒親熱，才會有如此好艷福。
王晶執導，張家輝、陳煒和陳苑淇主演的新片《提防老千》下周四上映，這套以老千為題材的電影除了有幾場賭王決戰的場面外，還有不少激情戲。前晚該片在旺角UA朗豪坊戲院舉行首映，陳煒穿上低胸裙陪伴緋聞男友王晶赴會。
僅着孖煙囱
對於片中的大膽鏡頭，陳煒說：「其實我拍戲都有底線，起碼三點不露，所以我同導演王晶、張家輝嘅親熱戲，重要部位都黏咗膠紙㗎。好似拍喺按摩池做愛嘅場面，重要部位都有遮掩，導演原本想上身着住衫嚟拍，但我當時覺得冇理由喺按摩池會着衫，所以就要求導演唔好怕醜，叫佢剩係着住條孖煙囱就得。呢場戲係劇情需要嘅，因為講我要勾引家輝，專登搵阿晶嚟激佢。」
男主角張家輝和陳煒的親熱戲只是點到即止，與王晶不能相提並論，難怪家輝笑說：「梗係啦！阿晶自己做埋導演，佢係咁臨場加戲畀自己做，當然好艷福啦！不過我都要求要加一場露股戲畀自己，因為戲中有場戲我會俾人雞姦，咁以一個露股場面交代都正常。」
老婆愛禿頭
家輝續說：「其實我拍呢部戲犧牲好大，搞個M字額，連我個乖女都唔認得我，右邊頭髮又生唔番，搞到好稀疏，我真係驚變禿頭，不過老婆話禿頭仲好，唔怕俾人吼！你話係咪俾佢激死。」
採訪、攝影：魯萍
