電盈出售資產一事，經網通大力反對，卒之演變成為盈拓亞洲（新加坡上市公司）出售手頭上持有之電盈股權，盈拓小股東在十一月三十日投票決定是否容許盈拓出售電盈股份，寫稿時仲未知道結果。如果按牌面計，六蚊賣股會好過電盈在投票前嘅股價，盈拓小股東㩒完計數機，相信會投贊成票。如果竟然投反對票嘅話，咁就表示啲盈拓小股東認為電盈可能仲有啲前景，李澤楷管理電盈會勝於梁伯韜。大家今日睇報紙就知道結果啦。
左丁山睇完十一月二十九日之《金融時報》頭版頭條故事，有啲感慨，無論李察是否出售股權成功，因中方極力反對電盈出售資產畀麥格里或者新橋，香港嘅國際聲譽已受到損害。《金融時報》嘅深入報道指出，港澳辦主任廖暉係反對嘅主力，本來網通啲高層當初冇乜反對意願，曾考慮出售資產建議，但因港澳辦堅決認為電盈嘅資產屬「策略性」，不能售予外國財團，廖暉親自拍板干預，指示網通做事，故此網通先至改變態度，強烈反對以七十億美元出售電盈主要資產。
《金融時報》引述外國投資銀行家說話：IthasbeenterribleforHongKong'simage。此事嚴重影響香港作為一個自由市場，可供外國投資者買賣資產嘅形象。
唉，卒之網通咪又係引入西班牙電訊嚟買入盈拓嘅電盈股份，若然只許州官放火，不准百姓點燈，電盈售產事件會係經典例子。咁睇法，以後凡觸及本港水、電、煤、電訊以至鐵路、機管局公司之買賣，都要先得到北京批准，本地監管機構係廢嘅，行政立法兩會靠邊站；如果北京開綠燈嘅話，特區政府又點敢sayno啫，一國兩制喎，一受到挑戰，已露出原形。以後特首去外國演講，俾外國商人問兩條問題，一條係空氣污染，一條係引述十一月二十九日《金融時報》問一國兩制，相信特首唔易應付，佢身邊啲謀臣，怕且已寫定模擬答案喇嗎？