布力般由上星期四到𠵱家都無比賽，球員叉足電，禮拜六主場鬥富咸點都有着數；富咸啱啱贏完阿仙奴，怕且無兩咀，應屆獲利回吐。唔使諗，1.9倍熱W極抵捧。
想知「悠」字嘅解釋，唔使查字典，睇布力般領隊曉士唔使備戰，早幾日仲有時間去醫院作親善訪問，俾成班中年女護士包圍……，就知咩叫「悠」。又係嘅，隊波踢完上星期四作客和飛燕諾場波後，難得有9日休息，除咗史提芬列特、羅拔斯等長期十字兵之外，禮拜六基本上可排強陣。
驟眼睇，布力般今季7場主場聯賽2勝2和3負，認真唔標青，其實3場輸波中有兩場係分別輸畀曼聯同車路士；另外打和熱刺同愛華頓呢啲實力分子，而打贏曼城、韋根。我唔敢話布力般係值長揸嘅「大藍籌」，但今次主場出擊，熱W絕對值得「短炒」。
富咸連番硬仗「謝晒」
當布力般球員休養生息期間，富咸就踢過兩場「硬嘢」。先講上星期六主場對同級球隊雷丁，踢咗10幾分鐘，伊恩皮亞雅斯就做「紅牌阿姑」，被趕出場，搞到隊波大部份時間10個鬥11個，終於主場輸0:1；到前日，富咸喺倫敦打吡惡鬥阿仙奴，爆冷攞3分後戰力幾乎消磨殆盡。唔計布拿特、彭比治班長期傷兵，富咸續有基度爾、保卡尼加因傷缺陣，唯一喜訊係伊恩皮雅斯坐完波監可以復出。
不來梅有後顧寧捧哈化
講完熱門再講冷門，德甲雲達不來梅主場對哈化柏林，牌面當然秤高主隊。不過，係人都知雲達不來梅下周中喺歐冠盃同巴塞隆拿決生死，話唔留力就勢係假。睇番不來梅之前5輪歐冠盃分組賽前嗰5場波2勝3和，勝率唔高，今次熱W靠唔住。
其實哈化柏林都算係隻優質「二線股」，今季7場作客只係輸過兩場，睇彭廸歷同埋基拔圖咁「弗」，射爆雲達不來梅唔出奇。一於吼哈化唔輸，撐「客勝」之餘，有籌碼更可試5倍冷W。
投資特攻隊金句
富咸一個禮拜踢3場波，話無消耗就勢係假，同布力般此消彼長。阿仙奴躉啱啱因為呢隊波損手爛腳？一於靠布力般復仇。