前一排先講過，恒生每年10月中到2月中，幾乎日日都會請客食蛇同佛跳牆，就連九倉大老闆吳光正，都畀面到會，蛇宴有幾吸引？睇怕都唔使華華多講啦！
上個星期六柯大班先做完東，喺恒生頂樓博愛堂宴請傳媒食蛇，噚日就輪到投資及保險部阿頭馮孝忠做Host，唔止有蛇，仲有蓮子南瓜燕窩露，聽到都食指大動。
雖則話係蛇宴，但頭盤除咗蛇羮之外，仲有佛跳牆任揀，馮孝忠偏偏兩樣都唔食，點咗青紅蘿蔔煲豬肉，佢笑笑口話，已經食咗好多餐蛇同佛跳牆，日日都咁補，真係乜quota都爆晒，所以要節制吓！跟住有同枱高層爆料話，為咗自己嘅健康，又唔想得失班客，所以有時都會出吓蠱惑，用牙菜整齋蛇羮扮吓嘢。
馮孝忠噚日請食嘅蛇宴共六道菜：
蛇羮/佛跳牆
露筍百合蝦球
金華蒸白雪魚
碧綠蜆芥雞
蒜汁肉絲煎生麵
蓮子南瓜燕窩露