噚日恒指反彈近180點，開始令不少投資者回復對港股嘅信心，而近期多隻新股上市，已經吸引大批散戶嘅關注。繼招金礦業（1818）之後，相信最多散戶留意嘅新股，莫過於錦江酒店（2006）及中國交通建設（1800），網上討論區亦有不少網友談論箇中投資價值及前景。
《香港討論區》網友m36252嫌錦江招股價偏貴，話︰「佢預測巿盈率都有成廿幾倍，覺得管理層好似想抽水，而且每年盈利增長又唔高，抽唔過。」但其他網友就立即反對，認為錦江係首隻純內地酒店股，屬品牌連鎖酒店龍頭股，又有奧運概念，值得買入。網友阿格麗希笑言︰「大陸好似冇乜酒店股，佢將會成為焦點，市值細又易炒，長遠佢升到4元都唔出奇。」
至於中交方面，雖然大多數人都指佢上市後，股價升幅會較錦江遜色，不過勝在夠穩陣，內地基建前景又樂觀，可作中長線投資。網友rexfan稱︰「年尾咁多隻新股，我最睇好中交，因為大陸未來會有不少基建項目，收入應該都唔錯。」網友iamaman更直言︰「如果出現跌市，會放棄其他幾隻風險大嘅新股，加大注碼抽中交。」