股路縱橫:陸續有新部署確利達快開車

股路縱橫:陸續有新部署確利達快開車

確利達(1224)噚日高收0.425元,升10.4%,睇個勢,牛皮咗成兩個月,家吓仲未算起步,只係熱緊身,一升破0.44元,新嘅上升浪就確認開始,下一站,股價可以翻一番。
確利達大變身,轉型成為內地大房產股,基金北上,去重慶走咗幾轉,睇見個「波蓆」咁大,嗒晒糖,上次公司配售34億新股,全部由幾個大基金要晒,聽佢哋講,其他上咗車而未揸夠5%嘅基金,起碼有幾十個。
大股東張松橋明益確利達,將估值67.3億元人民幣嘅重慶渝北區心臟地帶11幅地皮同樓房,以大折讓5成嘅33.18億元注入,收新股同CB,CB換股價分10年遞增,由0.28元上升到0.434元。
通常而言,賣家收CB,多係保障自己,睇定先。但張氏呢個月收到CB後,已急不及待換股,家吓已換咗三分二,可見張氏對公司有幾大信心。

基金看好公司前景

現時確利達發行股數156.16億股,若最後一批CB換埋,股數將上升至180.53億股,張氏將持有107.14億股,佔59.35%;另外渝港(613)持25.42億股,佔14.08%;再扣埋基金揸住嘅34億股,公司發行股數雖大增,但公眾股東亦只得13.88億股,佔7.7%而已,若有基金再增持,流通量會仲小。
基金對公司前景睇得好好,同佢哋傾開,知道大股東在內地幾個大城市,仲有好多靚地,佢哋有信心公司陸續會有注資行動,「明益」的可能性亦好大。
講番個市,急跌一日後,已拒絕再跌,恒指收市彈番141點,收報18780,國企仲犀利,H指收8402,升番268點,收復番大半失地,未來嘅投資策略,大藍籌只係一隻中移動(941)可取,國企仍係升市嘅主流,金融同保險股調整後可再上,內房股繼續強勢,資源股有機會成為另一個火車頭。
郭兆誠