噚日華華睇港交所嘅股東權變動資料，見到JoeZhang張化橋分3日沽咗1000萬股深圳控股（604），套現3328.6萬元，佢手上面仲有1400萬股深控，持股量0.5%，根據該股噚日嘅收市價3.3元，市值4620萬元。
其實趁股價升，減持股份套現唔係乜嘢新聞，華華對Joe沽深控咁有興趣原因係，上個月初華華先同Joe碰過面，當時佢仲話雖然大陸地產政策不斷變，但「富貴險中求」，所以獨沽一味淨買大陸地產股，佢仲巨細無遺講深控前景有幾好，點知轉頭又靜靜雞沽貨，係咪有特別意思就要碰面時再問。
Joe一向有民企之父美譽，佢今年初加入深控做執行董事，人未到位隻股已經急升，當時市場將之稱為「張化橋效應」，今次沽貨會唔會觸發第二次「效應」呢？