美國銀行（BankofAmerica）經過30年嘅努力，終於超越老對手花旗集團（Citigroup），成為全球市值最大銀行，一嚐當一哥滋味。至於上市僅個多月嘅中國工商銀行（1398），進佔龍虎榜第五位，較英國滙豐控股低兩位（見表）。
不過，由於美銀昨日派息，令股價低於周二，一哥地位恐曇花一現。美銀市值前日升至2437.10億美元（約1.9萬億港元），高過花旗嘅2435.21億美元。自CEO劉易斯01年上任至今，美銀共動用逾900億美元進行併購，呢種積極態度顯然得到股民認同。
相反，花旗CEO普林斯無意大舉收購，投資者亦不滿花旗未能有效削減成本。自普林斯於03年10月上任以來，花旗股價累積漲8.9%，被美銀嘅39.1%升幅拋離。
不過，以資產計算，花旗仍係業內老大，其資產截至9月底較美銀多近3000億美元。花旗嘅股東回報率（ROE）為20.5%，亦勝過美銀嘅16.6%。