雖說美國樓市吹淡風，但樓市點差都好，啲人都總要搵個竇擋風遮雨。所以如果銀根鬆動，唔少人都會買樓自住，供樓當儲錢，趁市旺賣樓仲可能有錢賺㖭！不過，對普通打工仔而言，買樓始終係人生最重大嘅投資，點都唔可以太過輕率。
留意租務謀後路
買樓初哥Ameiko喺《MSN》討論區留言話，佢年薪有10萬美金（下同），每年約有1萬元花紅，但唔保證公司一定會發放，每月大概儲錢1800至2000蚊。佢𠵱家已經儲咗3萬蚊做首期，準備喺一年內榮升做業主，想向網友請教買樓注意事項。
網友judyfishgeek話，買樓要考慮嘅問題好多，例如揀區時先問自己想住市區定郊區？鍾意同區人口年紀較大抑或係年輕社群？有冇特別需要某啲社區設施或屋苑會所？未婚嘅有冇諗住短時間內結婚？已婚嘅話，有冇計劃生仔？新居係咪鄰近學校？佢認為呢啲問題都要喺落實買樓前諗清楚，因為若家庭狀況出現變化，買家可能好快就有換樓嘅需要，打亂晒預算。
alaskagurl亦忠告入市新丁買樓要留神，扑槌前要喺唔同時段睇多幾次樓，最好就係周末同假日去視察一下當地的交通情況，同埋留意地理形勢，如果要到雨季先知睡床隨時會變浮床就太遲喇！
佢又認為，買家無論有冇養寵物，都要留意家居附近係咪准人養，否則後患無窮！CRONEWITCH就認為，要留意新居嘅租務情況，他日如果想轉換生活環境但層樓又賣唔出嘅話，都可以轉做包租公！