食鐵板燒，例牌動作係眼定定望住師傅攞住鏟刀鏗鏘一聲，落油加鹽加醋灒酒，「呯」一聲，一陣火光熊熊升起，熱辣辣嘅食物就擺在面前，趣味之處就是可以當Show咁睇。不過你𠵱家有機會做到鐵板燒師傅喇！因為喺深水埗開咗間首創嘅D.I.Y.鐵板燒店，自己落調味、自己控制火候，可以放心俾小朋友一嘗入廚落鑊的滋味，或者燒出來的味道無師傅做嘅咁好味，不過享受過程已經過足癮。
記者︰方綺君
攝影︰陳陶鈞
唔會食到一身燒烤味
食鐵板燒往往要假手於人，自己動手燒，雖然火光熊熊的情況欠奉，不過大人小朋友同樣可以過足癮。老闆黃生話︰「鐵板燒DIY是全港首創，由買爐到其他配套，每一枱鐵板燒枱差唔多要兩萬多。」咁貴只因為全港獨一無二，而且設計細心周到，糅合了日韓兩國鐵板烤爐的特點，爐的兩邊均有抽氣孔，煮食時的油煙、熱氣立刻被抽走。以往食鐵板燒都沾到一身討厭的油煙味，人人都聞到，𠵱家就沒了這個煩惱。當鐵板板面燒到紅紅的時候，四邊的不銹鋼位置依然冰冰涼，可以放心俾小朋友一嘗入廚落鑊的滋味，餐廳亦有提供即棄圍裙，彈油亦唔怕。
大廚教路 猛火燒牛肉最好
鐵板燒板面的最高溫度可達200多度，可以選擇的燒物由肉類到海鮮如牛仔骨、大蝦、帶子、阿拉斯加蟹腳和鵝肝等多達20多款，唔想煩亦可叫套餐，有埋調味自己調校味道。不過食物有咁多款，款款都用同一個火候同溫度燒？有無必食推介？小記力推店中的澳洲M6級和牛，輝哥話︰「店中供應的牛肉係澳洲M6級，溶雪後放入燒到紅的板面辣一辣，立刻鎖住肉汁，到入口的時候仍然又腍又多汁。」
澳洲M6級和牛$128
一塊重8安士，因為直接從澳洲當地入貨，所以先可咁平價享受靚貨，據大廚輝哥講，M6級和牛牛味更加濃郁，肥膏少之餘燒過後入口即溶又軟又腍。因為太受歡迎，幾日內已賣晒整整兩大條，足足30幾客，所以想食要等到12月中先有貨。
鐵板１人餐$78-$98
店內有三款不同的鐵板1人餐，一個人份量其實有多，一定唔會太少，火候到調味都可以隨自己喜好調校，每個餐仲有炒飯炒麫和甜品附送。
雜錦刺身脆餅$38
師傅自創的刺身新食法，先以印度胡椒薄餅做底，上面鋪上吞拿魚、劍魚腩、三文魚和蟹子wasabi，又脆又暖的薄餅記得上枱即食，和新鮮的刺身配搭出兩種不同的口感。
味噌野菌蟹鍋$48
原隻花蟹賣相已經好吸引，濃濃的日式味噌湯底浸煮野菌味道非常配合，齋飲或撈飯食變成湯飯，又係另一種風味，食一啖之後就停唔到！
韓式滑豆腐海鮮鍋$38
有蜆、有蝦及魷魚，一鍋湯料多到滿瀉，用傳統的韓式方法製作，味道巴辣，大廚輝哥話，食之前落一隻生雞蛋，湯的口感會更加滑。
建議4人餐單
除了鐵板自燒，「日之旺」的鎮店日韓料理都值得一試。加埋鐵板燒，兩個小朋友加埋媽咪，夠食有餘。
鐵板1人餐B $88
（珍寶元貝、牛仔骨、金菇牛肉卷、雞軟骨、日式餃子、炒雜菜、炒飯及甜品）
鐵板1人餐C $98
（西冷牛肉、墨魚嘴、軟骨餃子、茄子、炒野菌、炒飯及甜品）
韓式鰻魚石頭飯 $55
韓式滑豆腐海鮮鍋 $38
加一收費 $27.9
總值 $306.9
睇路搵食
日之旺（27286963）
地址︰深水埗青山道155-181號天悅廣場地下CA5舖
營業時間︰
星期一至五12:00nn-3:30pm、6:00pm-12:00mn
星期六、日及公眾假期12:00nn-4:30pm、6:00pm-12:00mn
座位︰約60個
交通︰長沙灣地鐵站A2出口，步行約10分鐘
有着數︰一星期每日都有不同的特價推介，如星期一的1磅三文魚刺身只售$58；星期四$20就可以食到親子軟殼蟹手卷，推介每月更新。