世人皆知英超富豪球會車路士大把米，喺轉會市場上都俾人㩒住搶，西甲球會華倫表明想買斷佢哋前鋒韋拿就出1億鎊（約15.2億港元）啦；但車仔高層口笨心不笨，日前正式同中國網站新浪網拍膊頭搞官方中文網，借機撈一筆，真係除笨有精！
查實拜仁、巴塞同國米等大會早有中文網，車仔當然不甘後人，個官方中文網將於07年正式開張大吉，背後原因當然係中國13億人口嘅龐大市場啦；而合作夥伴新浪相信大家略有所聞，據講佢哋每日有成4,000萬人次點擊率，呢壇嘢可收到互惠互利嘅效果。
負責車仔市場策略嘅簡安係有腦之人，預計佢以官網打響頭炮外，很可能不久會向中國球員埋手，吸引更多同志們嘅關注；但係，我哋如果要瀏覽呢個網頁就要趁早學多啲簡體字同大陸譯名喇，事關大陸叫車仔做「切爾西」、摩連奴叫「穆里尼奧」、謝列美叫「格雷米」等，唔學嘅話，到時睇住啲中文字都一頭霧水就無謂啦！
傳「軍刀」１月返AC
至於英國傳媒日前大爆「軍刀」舒夫真高，好可能喺1月被借返AC米蘭，咁啱又同韋拿來投嘅謠言不謀而合，但阿巴莫域治又話「軍刀」他日可以做埋球會主席位……唉，我求大俠都畀佢哋搞到頭暈，可信性有幾高都係留俾讀者判斷喇！
「香港人未必個個識睇簡體字，𠵱家學定都未遲嘅，呢啲都算係自我增值嘛，第日搵工都容易啲啦！」