最近夜晚天氣特別涼，可以食番碗熱辣辣的糖水暖胃就最歎。正御品居一向喜歡創新，成日設計新甜品，他們自創的招牌芒果腸粉連日本雜誌都有報道，有好多遊客慕名而來捧場。我早兩日去幫襯，老闆話剛剛為今個秋冬設計了一款滋潤甜品，連名都未改好，截稿前老闆先諗好叫椰香百寶粥，材料有西米、紅腰豆、南瓜、芋頭、椰汁、椰絲、蓮子同百合，滋潤之餘還構成多重口感，而且顏色繽紛，凍食、熱食都得，老闆就話秋冬都係熱食好啲。
記者：林思樂
椰香百寶粥$18
新設計的秋冬甜品從未曝光，採用8種滋潤材料做成，老闆率先介紹畀《蘋果》讀者。
芒果腸粉$28
正御品居的鎮店之寶，睇落以為真係用酒樓點心的腸粉皮，食落非常爽滑，啜一聲滑入口，帶點清新椰汁味，裏面的芒果好鮮甜，唔怪得日本雜誌都介紹。
正御品居（27718105）
地址：旺角廣華街3號百利達廣場地下1號舖
營業時間：12:00nn-1:00am
知諸精：我百足咁多爪，話畀你知去邊度搵好嘢食！