港股周二單日跌咗500幾點，呢兩日追番一半有多，恒指昨日貼住條20日線收市，成交繼續縮，反彈動力睇嚟已經消耗得八八九九。
場內同場外嘅期指結算都完咗，好淡雙方都要重新部署，恒指多數會轉為窄幅波動，波動區應該喺18650至19050，如果10日線一直壓住指數落嚟，咁樣10日線就會成為波動區嘅頂位，即係話波動區會進一步收窄。
恒指、H指同紅指，只得H指破位，睇嚟國企股仲係股民至愛，唔理輪流炒定全面炒，啲股民都會集中喺國企股入面揀。
石油股炒番上嚟，藉口人人都知，就係油價破咗60美元又破埋62美元，不過，大家只要睇吓啲金價就唔會對油價上升睇得太樂觀，自從油價開展大跌浪，啲金價就係咁跌，因為美國嘅通脹回落，經濟向下，金價喺低位反彈，靠嘅已經唔係通脹，而係美元轉弱，所以，呢兩日油價升，金價不升反跌，因為美元強番啲，咁樣期油上升憑乜嘢呢？咪就係炒油組減產同埋技術反彈囉，喺咁嘅環境之下，油價升到技術阻力區，炒家會點做？油價又會點？大家諗吓應該會好清楚。
中石化C輪2295：中石化（386）晉身恒指新貴，基金捧場客梗係多，先兩日跟個市跌，試吓20日線即刻成交倍增，好快又上番6元樓上，昨收6.15元，應該好快上試日前高位6.44元，破咗位最少都要睇6.80元。中石化C輪2295昨收70仙，槓桿率8.8倍（有效5.7倍），對沖值0.65，正股升上6.44元同6.80元，2295應該唔會低過88仙同1.15元，呢價值買，正股跌穿5.95元止蝕。
俊 樺