年僅44歲嘅渣打集團新任行政總裁冼博德（PeterSands），唔單止創咗呢間寶號最年輕GroupCEO嘅紀錄，仲可能創出多個第一，包括2002年由麥肯錫過檔渣打後，喺不足5年內，就火速升到呢個集團2號位置，佢亦可能喺首位由財務董事，晉身CEO嘅高層。
這位年輕俊朗嘅新任揸fit人，噚日以香港為出訪首選地，對於外界冠以最年輕銀行大班稱呼，佢笑笑口幽自己一默：「無疑我係比較年輕，但就已經滿頭白髮。」
與戴維思「為敵」
與渣打一樣，冼博德「產地」來源雖然係英國，唔係香港，但靈魂就植根香港同埋亞洲區，原來佢媽咪喺印度出世，爹哋就來自馬來西亞，咁啱呢兩個國家，渣打都有唔少收購同投資，真係計數都冇計得咁準。冼博德同老記講，佢8、9歲已首次踏足香港，依稀記得個維港好闊，儘管𠵱家維港窄咗啲，之不過景色都仲係咁靚。
記者會上，佢又不忘大打香港牌，結束時以廣東話「聖誕快樂」祝福大家，贏得現場唔少掌聲。喺佢眼中，香港唔單止係渣打嘅福地，仲係世界級嘅國際金融中心，佢話前晚抵港，香港已亮起聖誕燈色，倫敦就要呢個周末先亮燈，言下之意，證明香港永遠快其他城市一步。
冼博德形容，與升任集團主席嘅戴維思，過去5年合作無間，唯一唔夾嘅，可能就係所捧嘅英超聯球隊，各有所屬，戴維思係熱刺擁躉；佢自己就係阿仙奴fans。
[email protected]