聽日日職聯上演煞科嘅冠軍大戰，由榜首浦和紅鑽（69分）主場對大阪飛腳（66分），只要紅鑽和波、或者唔輸多過3球，佢哋就可以捧走今季聯賽錦標。咁啱最後一輪聯賽定冠軍之外，連神射手得主都喺呢場定勝負，呢場大戰肯定相當精采。
撞跑馬「絲帶台」冇直播
不過球迷想睇埋今季最後一場日職比賽都唔得，事關周六撞正係跑馬日，晏晝1點扭開電視嗰陣，就會播緊賽馬而冇紅鑽對飛腳睇，作為波迷梗係冇晒癮。睇番「絲帶台」今季攞咗個日職轉播權，差唔多個個禮拜都有得睇；今次撞啱係賽馬日唔播波，都算叫做食唔到個尾糊咯。
講番今季日職嘅爭標形勢同上季一樣咁激烈，記得上年去到最後一輪賽程，有成5隊都有機會攞走聯賽冠軍；上季大阪飛腳後上封王，今年就被動好多，要作客淨贏浦和紅鑽3球先可以蟬聯冠軍，你哋話難唔難？
不過飛腳都有可能攞番過尾彩嘅，就係靠前鋒麥諾艾維斯攞走個神射手寶座，佢𠵱家以25球暫列「1哥」，但只係比紅鑽前鋒華盛頓多1球咁大把；呢場大戰兩位射手都可以正選出場，又睇吓邊個入波多啲？
「日職踢埋周六就會收『咧』，咁蹺又係最後一輪爭冠軍，講真求大俠鍾意睇波多過睇馬，唔知『絲帶台』英語頻道會唔會突然有好消息呢？」