賤物鬥窮人係永遠都啱嘅生存定理，雖然舊年NDS憑狗狗開始搶番個勢，機主人數不斷上升，但唔係個個都覺得玩正版至係啱，更因為燒錄卡大行其道，搞到相熟遊戲店主叫苦連天，話𠵱家真係賣PSPGame仲好賺啲。最近兩隻備受期待嘅大作《Winning》同《惡魔城》都係叫好不叫座，個勢冧得誇張過Sony股價都冇乜人吼，搞到賣咗幾日就停晒，冇咩人想要追柯打，睇怕賣埋啲貨尾就係咁先。
反觀剛推出咗冇耐嘅《JumpUltimateStars》就大叫旺場，初初見啲討論區勁多人講，以為唔少人都係玩Rom啦，點之問吓肥老闆佢都話賣得八八九九，𠵱家快將SoldOut所以要標番高二三十蚊，但都俾人係咁掃，真係NDS近年難得一見嘅搶購潮。肥佬話隻Game收集要素勁高，要玩晒所有嘢真係有排玩，計落數買正版都有so喎，雖然唔知係咪個個都咁諗，不過我都覺得支持正版係好事嚟，否則個個玩rom搞到舖頭唔再賣Game，損失嘅到頭來咪又係我哋呢班機迷？
文：快D_HL