噚日係貿發局成立四十周年大日子，貿發局大事慶祝，同日舉辦香港貿易四十年展覽、中小企國際市場推廣、創新科技及設計博覽及國際貿易經濟論壇等活動，不過最矚目要數黃昏時舉行嘅商貿世代展覽開幕酒會，因為同台有三位新舊主席一齊細說當年。仲有前總裁蘇澤光同施祖祥出席。最受人注目嘅自然係前行政局首席議員、前貿發局主席鄧蓮如男爵，佢專程由英國回港出席呢個盛會。
起會展最難忘
鄧大姐盛裝出席，戴上由四粒大藍色寶石配鑽石裝嵌而成的一對耳環，以及同一系列嘅奪目大頸鏈，身穿一襲白色套裙，全場矚目，而闊別多年嘅鄧大姐風采依然，容貌十年如一日。
大會安排佢講吓出任貿發局主席時最難忘嘅事，佢話係興建會展一期，當年就此議題跟政府擾攘咗幾年，最後決定由貿發局興建，而且仲為香港開拓一個新興行業──會議展覽服務。
無獨有偶，另一位貿發局前主席馮國經，亦認為佢在任期間最難忘事係興建會展二期新翼大樓，仲要趕及97回歸呢個重要時刻用，家吓已成為香港嘅新地標。
香港會議展覽業嘅發展真係一日千里，𠵱家又話要將舊會展作中庭擴建，將展覽面積拓闊40%；不過要作第三期發展則困難重重，因為環保團體極力反對填海。好在大會冇再安排現任主席吳光正講感受，分分鐘又係講擴建面對嘅困難。
不過，身為貿易發展局主席嘅吳光正，噚日真係由朝忙到晚，喺唔同場合發表演說。佢話繼商品、服務貿易後，將科技設計創意注入經濟各個領域，將係推動本港經濟發展嘅第三個引擎。
[email protected]