大市噚日繼續反彈，恒指裂口高開，可惜收市受制19000點同保歷加通道中軸，收報18960.48點，升179.55點。星期二嘅下跌裂口18998至19188點，短期內如果補唔番，後市跌穿近期低位18618.66點居多。H股指數張圖比較好樣，噚日都係裂口上升，完全補晒早兩日嘅下跌裂口，收報8546.6，升144.34，短期有力挑戰歷史高位8795.98。
恒指跑輸H指，皆因多隻重磅藍籌噚日有頭威冇尾陣，中移動（941）係其中一隻。隻股噚日朝早最高見66.70元，之後陰啲陰啲碌落65.40元收市，升1.10元，圖表上有啲險。
《香港討論區》內，yup777發現中移動出現死亡交叉：「10日線剛重叠20日線，今日（即周四）試回那20線後升不穿，低收，死亡交叉格局有機會成立，加上今日之反彈，很像跌破頭肩頂的後抽。總之明日、下周初將十分關鍵，小心！恒指要否大調整，命繫此股……開個日線圖看看就知，對上一次死亡交叉就是出現在5月的大調整。」
charles2047亦認同：「941走勢的確難睇，高開低收，純粹為早段升市做指數，15:30後沽壓好大，又冇人買番上去。」
Rach都睇得好淡：「死亡交叉，目標$55。」
內地發3G牌成隱憂
中移動過去半年勢如破竹，係恒指不斷創新高嘅最大功臣。隻股業績增長強勁，穩佔內地龍頭位置，惟現時較令市場擔心嘅係預期內地在明年初發出3G牌照，中移動一旦被選為發展成熟程度尚待考驗嘅TD-SCDMA，風險將會頗高。
技術走勢上，隻股喺11月形成一個下降通道，阻力同支持位分別係68.50同63.80元左右，加上受制保歷加通道中軸，短期唔易破頂，有貨嘅跌破63.80元先平倉，冇貨嘅耐心等調整到58至60元之間買第一注。
余文