廖創興銀行噚日開股東特別大會，通過改名為「創興銀行」。公司話，已故銀行創辦人廖寶珊喺20世紀50年代，創辦「創興書院」以春風化雨，不以一家一姓為念，所以銀行應該亦毋須以「廖」氏為名。廖創興銀行喺1948年成立，屈指一算，呢個招牌都用咗成58年喇。
喺股東特別大會上，華華見到年過76嘅行政主席廖烈文，今次見佢每邊耳仔都戴住助聽器，頻頻問隔籬嘅公司秘書，究竟啲人講緊咩。
但係好奇怪，當記者問佢點解上市公司要改名時，佢識得回應話，銀行並非家族生意；記者接住問佢有冇計劃出售股份時，佢又識得答話未有呢個意思。唔通佢識得讀唇語？抑或佢早有預備，知道記者要問啲咩？
改名之外，集團總部會喺12月23日搬去新址創興中心，12月27日正式對外營業。