有冇發覺全球行政總裁（CEO）愈嚟愈年輕？根據英國獨立企業研究機構BoardEx嘅調查發現，過去四年，英國富時350指數成份公司嘅CEO同執行董事嘅平均年齡，每年減少1歲，由02年嘅56歲，降到舊年嘅53歲。照咁睇，到2020年，CEO平均年齡將只有38歲，70歲嘅咪要企埋一邊？
搵錢黃金期45至54歲
《MSN》討論區嘅網民whatmoney2話，一般企業嘅「總監級」行政人員（包括CEO、財務總監、營運總監等）都有成45至60歲，不過，董事、副總裁同高級經理就好似後生十年，估計介乎35至50歲。
獵頭公司BuchananHarvey董事長喬哈爾講，𠵱家嘅CEO壓力好大，後生仔先頂得順。有網民就質疑，現時嘅行政人員可能靠關係，所以咁早上位，例如識得前任CEO或者大股東。
至於一般「打工仔」幾多歲搵錢最多，ARCHIEthe-DRAGON引述《維基百科》話，普通人嘅「黃金搵錢歲月」褪遲咗，由二十年前嘅35至44歲，褪到𠵱家嘅45至54歲。Phil5185解畫：十幾年前，五十幾歲嘅人唔識電腦，焗住要提早退休，今日唔少五十幾歲嘅人都識電腦，咪可以繼續打工賺錢囉。