商人劉坤銘太太羅霖身為三子之母，雖然已經42歲，但仲有一顆少女心。前日馮仁昭喺銅鑼灣巧遇劉太掃貨，但佢逛嘅並唔係名店，而係逛日本少女平民品牌VIVAYOU，仲大有斬獲㖭！
高檔貨齋睇唔買
前日下晝6點鐘左右，羅霖乘坐一部已有10年車齡嘅金色凌志房車，由司機接載到百德新街VIVAYOU時裝店換季置裝。佢兜咗幾個圈，巡視完新貨，就行咗入試身室。呢個時候店員就好似執藥咁，將大堆頸巾、衫同裙等分批送入去。羅霖試足大半個鐘，終於掃咗成大堆戰利品。馮仁昭聽啲店員講，話劉太係熟客，會將貨品送到劉宅。
掃完幾百蚊一件嘅少女平民服，羅霖又走去附近嘅日本高檔少女潮服TSUMORICHISATO專門店，睇嚟佢對少女服情有獨鍾。呢個品牌嘅服飾貴好多，一件衫要千千聲至有交易，慳儉嘅羅霖齋睇一輪之後，就行過隔籬較成熟嘅Cacharel女裝店，買咗一件幾百蚊嘅衫，最後帶住滿面笑容上車離開。
羅霖係91年亞姐冠軍，講真，以佢嘅年紀、仲生咗三個小朋友嚟講，絕對係駐顏有術，只不過去到着少女服嘅程度，就未免有多少奇特。
