投資通勝:追波好過追馬 - 蘋果波神

投資通勝:追波好過追馬 - 蘋果波神

今屆英超冠軍之爭看來已是曼聯單挑車路士,至於在另一邊廂,阿仙奴及利記嘅球迷,對球隊爭聯賽錦標可能已死心;不過在賭波嘅世界,莊家必然為頹勢球隊調節每場賠率,阿仙奴及利記躉咪咁快「跳船」。

修咸頓處升軌勿錯過

球迷緊記賭波係逐場計,強如季初個人不太看好、但喺英冠一馬當先嘅卡廸夫城,最近氣勢回落,計亞洲盤11月5場比賽,只錄得4成贏盤率,連榜首席位也失去,引證喺賭波盤路嘅世界,花無百日紅;反而修咸頓一眾主力傷癒後,在11月6戰5贏盤,筆者一早看好該隊起碼躋身前6名,近期走勢轉強,波友更要緊捉升浪。
至於英超,目前阿仙奴及利記成為名牌毒藥,阿仙奴在聯賽贏盤率(計亞洲盤)得3成半,而利記更劣到得2成半;事實上兩隊各有問題,短期內未必能急速反彈,不過扳回5成以上贏盤率合理,波友不宜太早判兩隊死刑。

賽期愈密愈利車仔

計長線搵食,始終車仔最筍,目前贏盤率有5成半,不及曼聯的6成6;個人估計車仔今屆不但可三連霸,而且贏盤率會有7成以上,賽事愈頻密,對藍戰士愈着數。
其實賭波輸咗,激氣極都唔及賭馬。禮拜三晚尾場隻1.9倍W衝鋒槍喺超慢步速下跑梗頸四,連續兩次熱倒,你就明白跑馬風險之高。追波始終好過追馬。
文:蘋果波神