大市彈完再彈，恒指已收復番過半失地，國企仲犀利，H指收8546，同上周四嘅8622高位只係相差76點，話唔定今日又可以再創1994年後嘅新高。
未來嘅大升市，國企肯定係主流，要睇好嘅有銀行、保險、房產同資源股，噚日仲話資源股會成為火車頭，果然中石油（857）、中油（香港）（135）、鞍鋼（347）同馬鋼（323）等又再開動，升幅由3%至7%不等；中石油、鞍鋼同馬鋼都係新高。
首長國際（697）係半隻鋼鐵股，噚日終於發力，高收0.58元，升3仙，成交5000萬股，股價已升穿4條主要平均線，MACD亦現雙牛入貨訊號，在鋼鐵股大強勢帶動下，首國股價應好快上番4月高位0.75元。
首國大落後，主要係同中期業績大倒退有關。06年（12月年結）的上半年，營業額21.92億元，減13.67%；獲利8420萬元，大減74.8%，因配售股份攤薄，每股盈利更大跌78.8%。
經營環境大有改善
鞍鋼同馬鋼股價能創新高，主要係鋼價回升，行業經營環境大有改善，首國股價長期在低位浮沉，着實係被市場忽略，未有反映到行業利好嘅因素，噚日初次創出近兩個多月來的收市高價，追落後，目標就係呢隻。
首國的製鋼業務，由全資的秦皇島及原佔96%的首秦經營，新廠房年底投產，以生產超過4米寬的中厚板，此類高附加值鋼種價格高，市場需求殷切，明年盈利會大有改善。
兩個禮拜前，首國將首秦20%權益售予現代重工，作價4.1億元人民幣，公司持股降至76%，仍係最大股東，今次交易，獲利9871萬元，下半年度入賬。
另外，意大利投資公司CarioTassara（CT）今年初入股首國，持有9.29億股，每股作價0.53元。首國能拍住現代重工和CT，對提升生產技術及拓展市場，非常有利。
郭兆誠