呢個星期兩大遊戲機主機PS3同Wii，以接近時間推出，自然成為機迷網友熱爆話題，當中除咗兩邊機迷評論、鬥口水外，最好笑莫過於玩Wii可以打爆電視，聽落好似好誇張，不過當睇番網上影片，拍低外國人玩《WiiSports》時之激烈，直情當正自己上咗網球場咁款，連抽拍都出埋，難怪連附送嘅手繩都扯斷，手掣變成網球、保齡球直飛電視，唔爆都幾難！
更加估唔到嘅係，外國已經有因應「電視危機」，而專為Wii手掣設計咗個防滑手套，睇個樣其實無咩特別，只係加個防滑墊，盒面再貼上個Wii專用之類Logo。有網友睇到就話：「咁隻手咪仲焗，畀我就唔用喇。」更有人以懷疑眼光講，驚遲啲會有人打到手套同手掣一齊飛出嚟！
筆者都親身玩過Wii，見到有人連手繩都可以扯斷，除咗話佢唔識用力外，亦佩服佢哋玩得好認真，擺晒Pose咁打，奉勸佢哋唔只要帶上防滑手套，連周圍都要預留多啲地方，免得撞親！
記者：許福合
網址： http://www.uwants.com/viewthread.php?tid=3057202&extra=page%3D1