噚日恒指回升近140點，中資銀行股表現突出，股價升幅介乎3至5%，令不少散戶鬆一口氣，相信港股會先企穩，然後再大升。不過，大多數網友認為港股反彈只屬假象，因為大戶想先沽貨，鎖定部份利潤，其後再逐步推高股價，慢慢引散戶入市，等時機一到，股災就會發生。
趁高位快沽貨
《香港討論區》網友揚言︰「大戶想製造反彈假象，引散戶入市，估計未來兩日恒指會下試至50天平均線附近。」網友johnny001亦同意此說法，覺得日前係一次過調整，大戶想先出貨，然後慢慢係低位收集，再推高股價引散戶入局，到時股災就開始。
另外，有網友指現時市況同今年5月中恒指大跌相似，港股很可能會係短期內見頂回落。網友solaraixunix話︰「記得5月恒指開始大跌時，中資金融股本來都企得好硬，但兩個星期後就跌得勁過恒指。」網友freewindhk指︰「美元轉弱，資源價格回升，情況有啲似5月，相信12月好可能會係調整月。」
既然唔少人認為大調整或者股災將近，有網友已經呼籲現時係最佳時機，趁高位沽貨。網友momotam168話︰「港股反彈係畀散戶走貨嘅好機會，不如就趁高位沽貨啦。」