一位讀者不久前寫電郵嚟問，股市不斷上升，而佢已經早已獲利回套，問左丁山應否高追。對唔住，呢啲問題，左丁山唔敢答，因各人之風險承受度唔同，面對損失之EQ亦唔同，自己如果高追而蒙受損失，會忍痛接受，但點知其他人願唔願意呀。
好嘞，呢日吃午飯，席上坐咗幾位專家，話題於是集中於恒生指數點睇。基金Ｐ話：「我哋啲行家有買貨，冇賣貨，睇美國三個月前景，搵唔到睇淡嘅理由，美國唔散，香港唔會有事嘅。繼續睇好。」
分析Ｌ細細聲講：「繼續要追，升上二萬三千點，只係時間問題。目前禾雀亂飛，總之凡新股都申請，仲有茶飯食。」左丁山驚中資股升得太多，太快，與基本因素脫節，唔合理噃。分析Ｓ立即大大聲講：「個市仲未癲，凡升市都唔多合理㗎啦，資金推動股市嘅時候，冇基本因素可講，亦無技術圖表可睇，總之就係升，明年初就會見二萬一千點，唔使驚喎。」
現在人人都係大好友，淡友早已失蹤或者輸死咗，故此早已獲利回套之人只有兩個選擇，一係袖手旁觀，日日恨得牙癢癢，一係跳落去游水，希望游得快過人。基金Ｎ話市面上有唔少第二類人，佢來電話：「我一啲對沖基金行家喺五月六月之時輸到眼坦坦，以後唔敢睇得太好，於是失咗入市時機，尤其是中資銀行保險股係咁升，佢哋手上唔夠貨，於是跑輸大市，到年尾埋單之時，會好難睇，難以向基金投資者交代，於是呢排搏命買凸，有少少係panicbuying，佢哋只買不賣，故此暫時睇唔到大市有拋售壓力。」
既然如此，唔夠膽嘅，小注怡情好嘞，總係小心啲好。譬如隻六八八（中國海外），三個月間狂升七成多，去到八個四，八個半，市盈率上到三十五倍，你估係科技股，每年利潤可以增加一兩倍咩？內地地產雖然長期看好，但升得太快就會惹來宏觀調控，呢個水位高追688，大注不宜。