一講食飯，浚傑同芷諾一定最捧場，佢哋成日話：「白飯甜甜哋好好味！」如果再加埋餸汁撈飯，真係零舍開胃，閒閒哋可以扒多幾碗。最近小城知味重新開張，除了招牌京滬小菜，還加入各國飯類，如海南雞飯、上海菜飯、西式焗飯、泰式咖喱飯、廣東盅頭飯等，有咁多款飯可以揀，帶小朋友去食一定好開心。好！即刻開飯喇！
記者：林思樂
攝影：黃子偉
Model：浚傑、芷諾、Daddy、媽咪
各地飯款引人飯敍
小城知味向來主打京滬菜，一向好受歡迎，之前全線關閉好多人都大感可惜。最近佢哋另起爐灶，重新開業，除了老本行京滬菜做得同樣出色之外，更加入了海南、泰國、廣東、西方各地美食。
小城知味盡量保留各地傳統做法，再加入創意改良，傳統中見新意。新餐單中以有餸飯最多，提供5式選擇。講到明係飯桶，當然對煮飯亦有要求，佢哋話選米都好講究，只會用泰國米，不會用中國米，因為用中國米煮成嘅飯較腍身，失去口感。與朋友或一家人叫幾個飯Share食就最好，唔使次次都係炒小菜叫白飯咁悶。而小城知味的菜式價錢合理，仲免收加一好抵食。
招牌海南雞飯套餐（送例湯）$58
屬店內的招牌菜，採用新鮮走地雞，雞皮脂肪少，不肥膩，肉質嫩滑彈牙，用滷水、香茅、雞油、雞汁、薑葱浸約半小時，非常入味，而雞肉去骨去翼，通常都是雞胸搭雞髀，一隻雞只做到四份，認真講究。
正宗上海排骨菜飯
（連例湯、油菜）$48
排骨用正宗上海煮法，用糖和老抽炮製略帶甜味。炸排骨的方法是改良自上海傳統炸年糕的做法，所以食起來不油膩。好多地方的菜飯都會做得太腍，但呢度嘅菜飯就軟硬適中，將小棠菜切碎，啖啖飯都有菜的鮮味。
咖喱羊仔肉扒暖鍋
（配葱油餅或菜飯）$68
咖喱汁用上21種材料炮製，成煲材料要幾千蚊，咖喱材料比例平均，所以味道好香濃，而且不太辣，送飯一流！而且少用丁香和茴香，食完不會燥熱。羊仔肉扒即滑溜的羊鞍部份，入口自新西蘭，先將羊肉煎一煎鎖住肉汁才加入咖喱一齊煲，食落一點也不羶，小朋友都食到。另一賣點是配菜中加入炸豆腐，成嚿吸收晒咖喱汁，一啖咬落去簡直是一種享受。上枱時用蠟燭烘熱鍋爐，保溫又唔會黐底，可以慢慢撈熱汁送飯。
灌湯小籠包（4隻）$18
皮薄不在話下，湯汁以豬骨、豬肉、豬皮用慢火燉，然後雪凍成啫喱狀包入小籠包內蒸熱溶化，所以有咁多汁。餡肉用豬後腿、五花腩混合而成，有咬口又不肥膩。
原盅鳳爪排骨蒸香苗$28
廣東茶樓式盅頭飯，但外面的是一早蒸定，這裏是即叫即蒸。用鮮排骨配泰國絲苗米，軟硬適中飯味十足。
香檳芥末汁焗牛腩飯$45
紅汁白汁黑椒汁食到悶的話，不妨試試芥末汁。咪以為芥末汁焗飯會好辣，食落反而甜甜哋好易入口。牛腩清蒸後再放上飯一齊焗，保持原汁原味。
建議4人餐單
有2個小朋友的4人家庭最好叫三飯一餸一小籠包，本身飯已經有餸，唔使叫咁多小菜都得。
招牌海南雞飯套餐（送例湯）$58
咖喱羊仔肉扒暖鍋$68（配葱油餅或菜飯）
正宗上海排骨菜飯$48（連例湯、油菜）
糖醋魚柳$35
灌湯小籠包（4隻）$18
免收加一、免茶芥
總值$227
睇路搵食
小城知味（29560888）
地址：尖沙嘴海港城港威商場地下G103號
座位：約90個
營業時間：星期一至五9am-11pm；星期六、日及公眾假期11:30am-11pm
交通：尖沙嘴地鐵站A出口，經海防道行向廣東道官涌方向，在嘉禾海威戲院旁邊。
人均消費：$60-$100
有着數：憑即日嘉禾海威戲院戲票，於下午茶和晚市時段可獲九折優惠。
