政府拍賣兩幅官地，成交價十分理想，但係個市唔單止冇得升，仲跌咗564點。
個市要回，已有迹象，原本諗住啲地產股可以減慢個市嘅跌勢，但係碰啱前晚美股大跌，就益晒淡友挾住個勢大力推低港股。
今日期指結算，好淡雙方都會睇住昨晚美股個勢嚟造，淡友雖然喺短線嘅技術走勢同埋市場氣氛都有優勢，但係好友仍然控制住個大局，呢個局會唔會變，就要睇昨日港股下挫嘅背後動機，如果淡友只係為咗結算搶番啲失地，咁樣個市再下跌嘅空間就唔會好大，而且仲好快會反彈，大家要洞燭先機，今早要留意吓港交所（388）公布嘅未平倉合約數字嘅變化，如果發現昨日所有月份期指未平倉合約嘅「總數」縮減超過15000張，咁樣就好有可能代表淡友只係短線還擊，如果縮減嘅數字少過呢個數，甚至只有幾千張，咁樣，好淡大戶喺未來幾日仲會有惡鬥。
睇大環境、賣地成績、走勢圖，好友都佔優，俊樺仍支持好友，只係入市注碼要細番啲。
富士康C輪2474：富士康（2038）昨日逆市上升兩個價位，報收24.50元，成交兩億幾元，絕對唔係玩嘜價，隻股早幾日跌穿咗50日線，大陰燭加大成交，走勢淡得好得人驚，點知之後兩日喺低位守得好穩，連續3日現陽燭，技術走勢轉番好，有條件上試25.30至26元，破位睇28元。隻C輪2474昨收40.5仙，槓桿率6.1倍（有效4.4倍），對沖值0.73，正股升上26元，2474唔會低過50仙，正股見28元，隻輪應該喺65仙樓上，現價買，正股跌穿23.50元止蝕。
俊樺