港股前日插水，好多股民都被嚇破膽，敢喺低位買貨嘅散戶相信唔會好多。
唔知大家有冇睇期指未平倉合約嘅數字，前日急挫後，未平倉合約總數唔單止冇減少，反而增加咗超過1.8萬張，超過19萬張。呢個係新高數字，反映啲乜，就係好淡雙方並冇因前日大市大挫而急於平倉，反而賭大啲，呢樣嘢反映短期嘅惡鬥難免外，亦反映一個危機或者機會，就係是但一邊「投降」，單邊嘅走勢將會瘋狂，𠵱家睇嚟，買好友贏仍然有好吸引嘅值博率，如果恒指遲啲升番上10日線樓上，好難想像班好友大戶會點挾個市。
滙市炒歐洲加息同美國遲吓減息，美元跌勢急速，搞到伯南克走出嚟講嘢嘅時候，作出好多明示同暗示，話唔知遲啲會唔會加番息，但又補多句仲有好多變數。其實唔難明，美元跌得太急，對美國好大影響，出吓口術希望緩和下美元跌勢，好正常。
交行C輪4628：昨日個市反彈，但係幅度只有141點，睇嚟啲沽壓未完，有機會下試18600，不過，應該對向上嘅大方向冇影響。國內嘅銀行股啲活力返番晒嚟，暫時升勢雖然參差，但係遲啲就會再齊齊玩大合奏。交行（3328）前日跌到20日線有大成交頂實，昨日升上7.13元收市，補番晒個裂口，將會上試7.5元，破位再試7.75元。
交行C輪4628昨收84仙，槓桿率8.5倍（有效5.3倍），對沖值0.64，引伸波幅升至32.1%，正股升上7.50元，4628應該喺1.05元樓上，正股升上7.75元，隻輪應該唔會低過1.25元，呢個價買，正股跌穿6.85元止蝕。
俊樺