講起甚麼頒獎之事，退休賓架S有故事講。佢未退休時，曾參與「青年工業家獎」評審工作，負責第二審，第一班委員審核獲提名人士之後，選出一張決選名單畀另一個委員會選出得獎人，佢記得當年攞過獎嘅，有幾位𠵱家好巴閉，建滔化工張國華就係其中一位。賓架S好記得另外有一位聰明絕頂嘅年輕人攞到獎，喺頒獎禮之夜，得獎人例牌要講幾句致謝詞或得獎感言。呢位聰明才俊，姑且名之曰L君，上台領獎時，神態飛揚，信心爆棚，一睇就知道係成功人士。
L君對住個咪，以凌厲眼光橫掃全場，跟住講：「我只想講兩句。我今晚得獎，第一要多謝滙豐，第二係我哋要食腦。」L君以手指住自己個頭，跟住下台返回座位，其氣焰令人矚目。賓架S做幾十年銀行，閱人多矣，當時就話：「此人終會失敗。」
果然，不出數年，L君兵敗如山倒，佢嘅恩人滙豐多得佢唔少。賓架S話：「喺香港做生意，尤其是中小企發達，梗係要多謝銀行支持啦，L君淨係多謝滙豐，我哋其他人返到銀行咪靜靜雞cutline囉（即減少貸款額）；第二，大庭廣眾之間話自己公司靠自己個腦，沙塵啲喎，容乜易成也蕭何，敗也蕭何，個腦袋一下子諗歪咗，我哋銀行就陪你死？做人無論如何少年得志，攞盡大獎，都唔可以咁樣講嘢嘅！」
年輕人應細味斯言，成功時不可興奮過度以致胡言亂語。賓架S現已退休，平日打波、飲紅酒、做義工，左睇右睇都唔似接近七十歲嗰隻，賓架S話退休人士最緊要放得開，萬事以平常心對待，每日運動，兼且仄住血壓、血糖。佢一早起身就拮手指，滴血驗血糖水平，佢話：「近日維持喺六點一，好輕鬆。」唔怪得食陸羽名點蛋白杏仁茶照樣加糖，在座前輩之中也有幾位要用代糖，一位索性不加任何糖分。賓架S話左丁山每日進食太多營養豐富食品，理應朝朝空肚拮手指（仄血）從而調整食物組合。