九鐵連接東鐵同西鐵嘅支線「九龍南線」上兩個月已經開工，預料09年搞掂，到時喺天水圍出尖沙嘴都只係半個鐘，真係方便好多。
交通改善咗，但樓價平均仲係千零二千蚊一呎，自然吸引想平平地入市嘅買家。網友亢龍就喺《香港地產城討論區》問大家：「西鐵沿線嘅樓入唔入得過？」引嚟60個回應，睇嚟好多人都對西北區好有興趣。
網友bitter話，可以參考番馬鞍山嘅情況：「其實唔使等2009年，就睇馬鐵，從MaOnShan到尖沙嘴仲唔使30分鐘㖭，咁MaOnShan啲樓有冇大幅上升？如果連MaOnShan咁方便都唔升，屯門咁遠又點會升呢？」
loklokzai亦都覺得咁遠，出市區快極有限：「冇得改變的係，NORTHWESTNT同市區的距離，真係好長，你點都要相當的時間去TRAVEL，不但COST好高，而且你響TRAVEL當中，個人係好疲累㗎。」
有人睇淡，亦有人為呢區抱不平。ex-RT認為，太多人唔肯打破固有觀念，嘗試吓接受呢度：「不管3號幹線通車後，元朗出中環只係半粒鐘，還是坐西鐵不用3個字就由美孚到元朗，只要一講元朗，或整個屯（門）元（朗）天（水圍），大部份人都會用『山長水遠』嚟形容，因為這個地方是一張畫花了的紙。」
買樓要兼顧感覺
car一副唔鍾意就咪入嚟態度：「係呀，屯元天區距離港九都真係幾遠㗎，所以大家千祈唔好湧晒入嚟炒呀……對於唔識貨的人，冇必要提醒佢哋。」
其實區區都有好有唔好㗎啦，買樓除咗睇價錢同交通，感覺都好重要嘅。