噚日係11月28日，諧音「日日易發」，偏偏大市跌到四腳朝天，恒指收市唔見564點，係01年911事件後最大單日跌幅。
港股咁跌法，最正路解釋係隔晚美股大跌。港股之前累積咗咁多升幅，今次借勢跌凸，一啲唔出奇；不過，網上有人賴滙豐風水局被破，引熊入室。咁都得？
遇上大跌市，唔少好友紛紛趕跳車，跳唔切車嘅點算？網上見有人發起喺IFC天台見，入場費每位564大元……純粹講笑啫，仲有心情自嘲，EQ應該唔會咁低。
上錯車，自然要跳車，咁搭錯機，應該點做？網上有人高位買咗南航（1055），隻股噚日收報2.85元，跌19仙，跌幅6.25%。
「香港討論區」入面，sckinn開市冇耐即出post：「本來持有1055，平均價$3.23×10000，今朝$2.92跳咗車……呢隻嘢我睇住佢升到$3.4x，但冇放，𠵱家倒蝕，勁心痛。」
awongsfu話佢沽得太早，佢認為隻股處支持位，唔使沽住。
superkid亦認為應該再等多陣：「隻股啲基本因素其實幾好，守得起其實應該守，不過你都幾高位入。753（國航）我都4.05入咗兩手，唔破50日線我都唔走住。」
油價趨升更不利
油價喺第3季持續滑落，加上人民幣升值憧憬，令南航股價由8月中1.59元低位起飛，上星期最高升至3.46元，3個月升咗1倍有多。不過，隨着油價喺近一個星期內由55美元升番到60蚊樓上，加上外圍股市急跌，南航股價亦急轉直下。
圖表上，現價雖然跌到2.8至2.9元密集區，但由於多項技術指標已轉弱，加上踏入冬季，美國耗油量預期會增加，油價料繼續向上，對南航不利。由於南航已連跌6個交易日，短期或有反彈，但3.05元阻力不輕，反彈後料再考驗2.80元支持，一旦失守，將下試2.40至2.50元，短線唔好有太大幻想。
余文