香港會計師公會噚日公布06年度最佳企業管治資料披露大獎，呢次已經係第七屆，而喺恒生成份股組別中，中電第四次連任為鑽石大獎得主。大會解釋，因為中電年報中將董事以至高級管理層嘅薪酬釐定準則都講晒出嚟；佢哋亦詳盡介紹企業嘅社會責任同對社會環境嘅貢獻。
由於內地企業喺港股嘅比重好大，所以大會今年加開H股組別，由江蘇寧滬高速奪得大獎，公司財務總監劉偉介紹，噚日亦係寧滬高速通車十年嘅大喜日子，得到呢個獎係最佳禮物。不過今年啲創業板公司表現較差勁，大會決定唔頒發任何獎畀創業板公司。公會會長陳茂波話，上市公司喺年報中，有關董事同高級管理層袍金，委任董事嘅原因，以及有關公司未來發展同所面對嘅風險嘅資料披露，有待進一步改善。