蘋果電腦開發集iPod音樂功能於一身嘅音樂手機iPhone，有傳言指最快可於明年第一季推出市場；台灣《工商時報》更有報道，指蘋果已向代工生產商鴻海精密落單1200萬部。不過，蘋果及鴻海都無回應有關消息。
據講，iPhone除咗有ipod嘅MP3音樂功能外，亦保留咗影相、遊戲同郵件收發等增值功能。喺《網絡工作者日報》（WebWorkerDaily）嘅blog入面，網友AnneZelenka就話，iPhone並非全球首個音樂手機，佢個人認為外形較討好嘅音樂手機就係新力愛立信嘅Walkman系列，但佢又質疑手機有冇必要具備音樂播放功能，同埋一部理想嘅手機，到底應該有咩功能呢？
JoshuaKaufman回應話，佢同大多數人一樣，都想部手機具備好多唔同嘅功能，但佢發現有太多手機功能其實都用唔着，所以佢認為手機具有通訊錄、最近嘅電話紀錄、功能捷徑同埋簡單操作嘅MP3及影相功能，已經好足夠。
操作最緊要夠簡單
網友PaulWatson就話，理想嘅手機應該具備音樂同通訊功能，但應用嘅時候唔可以太複雜，兩項功能都要容易切換。Yuvamani亦認為，理想嘅手機應該簡單易用，未必要有太多功能，但就幾睇好iPhone，因為可以為iPod迷同鍾意聽歌嘅用家帶來方便。
市場預期，明年全球手機銷量約10億部，美國科技研究員ShawWu認為，若iPhone能成功打入市場分羮，即使只搶到1%的市場佔有率，以每部手機單價200美元計算，每年就已經可以為蘋果帶來20億美元（約155.6億港元）收入。