港股昨日跌咗56點，後市會點？仲有沽壓，但係唔會好差，今日拍賣官地嘅成績應該唔會曳，地產股會支持大市，雖然地產股的磅數唔夠滙控（005）、中移動（941）咁勁，但係都可以拖慢跌勢，縮窄跌幅。
淡友已經畀好友㩒住嚟砌咗一段好長嘅時間，明日期指結算，相信點都會做番啲嘢，𠵱家個市嘅氣氛淡咗啲，唔單止因為滙控同中移動下跌，仲有國內啲銀行股一齊碌落嚟，影響咗入市嘅氣氛，從技術走勢睇，國內銀行股最少要跌多一兩日先至會企穩。
今朝個市點走，要睇昨晚美股嘅表現，雖然感恩節假期嘅零售銷售數字唔錯，但係啲美元跌得咁急，投資者點反應好難估，美元下跌當然有利有弊，但係跌得太急，一般都要當淡睇，不過，港股有期指結算因素，走勢唔係一定咁正路，加上今日賣地，個市隨時可以抽高質低三幾轉，除咗地產股外，其他股份嘅即市走勢可以好飄忽。
新地C輪4638：新地（016）前日整咗支「垂死十字星」，成交大幅縮減，昨日裂口上升，成交又顯著增加，走勢好靚，早幾日畀長實（001）威晒，今次應該輪到新地發威，會唔會爬長實頭早一步試100元，好快就知道。
新地C輪4638昨收50仙，槓桿率18.4倍（有效8.7倍），對沖值0.53，行使價93.888元，輕微價外，正股升越行使價，4638會好有爆炸力，引伸波幅23.9%，料會掉頭回升，正股升上96元，4638應該喺70仙樓上，正股如果上試100元，隻C輪應該會靠近1元，呢個價買番啲，正股跌穿89.5元止蝕。
俊樺