參加董事學會頒發二○○六傑出董事/董事會獎，與H專員同席，九時過後，H專員要回家告辭咯，因為一來掛住在十二月中臨盆嘅老婆，二來返政府工，原來要好早起身，上午七時十五分就有AM車喺佢大廈門口接佢返中環，晚上當然要六七點後先至放得工啦，如果可以放工嘅話！H專員以前做自由人，鍾意幾時返工就幾時返工，𠵱家要遵守政府紀律，都幾辛苦，唔怪得佢一早話明只做一屆。
跟住特首，好難有清閒時間。隔日去陸羽飲茶，碰到一位剛自貴州省回來嘅商界高層，佢話特首團辛苦過鴨仔旅行團，早上六點幾就起身，行程緊密，應酬頻繁，正式是早出晚歸，近晚上十時先至返回酒店房間，攰到暈，明年一月特首出行訪問江西，願意捱嘅，精神體力唔差嘅老友先至好參加！
貴州昔有「天無三日晴，地無三里平」之稱，甚為窮困，搞經濟發展，有好多困難須要克服，港商往貴州投資嘅熱心程度相信與年前曾司長率團去大西北之時相同。以前廣州嘅林樹森現在調咗去貴州，可能就係借重林樹森識晒著名港商，等佢憑人脈關係拉攏多啲商家去貴州考察、投資。
退休賓架S諗到一條橋，佢話毛澤東喺一九三五年一月靠遵義會議起家成為中國共產黨領導人，遵義對中共有重要歷史意義。林樹森大可在遵義召開一次經濟論壇，就叫做「遵義經濟發展論壇」啦，請港商、外商到遵義開口水會兼招商，搵埋國家領導人出席，應該好有宣傳效用。
「遵義經濟發展論壇」？有得傾噃，開會前全部與會人士到當年遵義會議地點憑弔、參觀、憶苦思甜、感謝共產黨，夠晒政治正確！搵邊個人主持好呢？貴州省領導人一定爭住做，不過最佳主持人會係中大校長劉遵義，佢在遵義出生，係國際知名經濟學家，號召力夠晒，貴州省若搵到劉遵義主持一個「遵義經濟發展論壇」，為黔省出謀獻策，會係高招。