好多人一聽到個「肉」字就覺得好肥膩，尤其是正減肥的女士更唔敢掂。其實適量食肉對身體有益無害，唔食肉仲好容易營養不良，皆因肉類營養價值高，含有豐富蛋白質、鐵質、維他命，還可以增強體質，有助小朋友發育。最近意大利餐廳Oliva開分店，推出全新菜式，首推燴羊膝和烤白牛仔骨扒，羊肉可以補肺，牛肉就可以補血，大人小朋友都要食！
記者：林思樂
攝影：陳盛臣
Model：馮諾謙、Christy一家
份量大啱一家人齊齊食
開業三年的意大利餐廳Oliva以價錢公道，材料上乘為宗旨，份量大，好適合一家大細Share食，打破一般人對意大利菜貴夾唔飽的印象，Oliva在意大利傳統菜式上加以創新改良，既保留傳統特色亦適合港人口味，所以一向大受食客歡迎。最近Oliva在荃灣廣場開分店，更加入多款新菜式，其中首推燴羊膝和烤荷蘭白牛仔骨扒配紅酒汁，肉質嫩滑，營養豐富，好味又健康，叫一份幾個人Share食就唔怕肥啦！
羊肉補肺養氣管
據《本草綱目》記載，羊肉可以補肺，減輕咳嗽，對氣管有益。轉天氣時小朋友氣管容易出問題，食羊肉補一補最啱。羊肉性溫，進食可以保暖，秋冬食最完唔怕凍。羊肉還有豐富蛋白質、維他命A1、B1、B2、鈣、磷、鐵等營養。雖然牛、羊肉都含豐富營養，但切勿過量進食，要注意飲食均衡。
牛肉有助增強體質
牛肉好似好普通，其實營養價值極高，是兒童吸取鐵質的最好來源，牛肉所含嘅蛋白質比豬肉多，脂肪較少，蛋白質能助長發育，修補細胞及維持體內新陳代謝所需。牛肉另含豐富維他命B6、B12、鋅、鎂、鉀、鈣等，有助增強免疫能力和增強體質，還有可幫助增長肌肉的肌氨酸、對抗激烈運動中造成的組織損傷的亞油酸等，好適合鍾意跑來跑去無時停的小朋友。悉尼大學的卡羅琳．雷博士更發現進食牛肉能提高人的智力，尤其對於學生進入考試這種需要「臨時補腦」的情況下，效果更明顯。
燴羊膝$69（連餐湯、飲品及甜品）
原本燴牛膝是餐廳嘅得獎招牌菜，可是牛膝成本高，所以師傅Andy改用羊膝，用同樣方法炮製，價錢平大半，而且用五成蔬菜五成肉燴汁，因為蔬菜是天然的鬆肉材料，可以令羊膝更鮮甜又唔羶。
烤荷蘭白牛仔骨扒配紅酒汁$188
荷蘭白牛仔骨肉質嫩滑，屬上等貨，出面食起碼要三百幾蚊，𠵱家只賣百幾蚊。醬汁用紅酒、雜菜、牛骨、牛肉、牛尾炮製，食落似濃郁的牛尾湯，Andy話五成熟就最嫩口，太熟會嘥咗嚿肉。
煙三文魚薄餅併五香牛肉薄餅$158
五香牛肉薄餅$83/6件
煙三文魚薄餅$107/6件
這個薄餅長2呎，闊1呎，有12件，可以自選兩種口味配搭，或可以要6件細份量。薄餅上的芝士用三款混合而成，色香味俱全。煙三文魚來自挪威，入口溶化，配以洋葱、酸忌廉，清清哋好滋味。
鮮帶子連度豆意大利飯$78
連度豆是意大利傳統豆類，好有咬口，一般用來做湯料和配菜，師傅Andy就創新用來做飯，讓一啖飯有三種滋味：連度豆硬、飯軟、帶子更軟，幾特別。好多人接受不了意大利飯太腍，但這個飯軟硬適中，忌廉味濃而不膩，對意大利飯有偏見的人都可以一試。
朱古力泡芙塔$42
街邊食一嚿泡芙要成十蚊，但呢度$42有13粒，一家幾口食都好夠。泡芙內釀滿朱古力吉士，外層布滿朱古力漿和新鮮士多啤梨，攝影師更連碟上的朱古力片都清埋。
建議4人餐單
有2個小朋友的4人家庭最好叫燴羊膝，連餐湯、飲品及甜品，再叫一個烤荷蘭白牛仔骨扒配紅酒汁、一個細Pizza、一個飯，再叫個沙律，咁就營養均衡又飽肚。
燴羊膝（餐湯、飲品及甜品） $69
烤荷蘭白牛仔骨扒配紅酒汁 $188
五香牛肉薄餅（6件） $83
鮮帶子連度豆意大利飯 $78
凱撒沙律 $38
加一收費 $45.6
總值 $501.6
師傅Andy曾奪「食神爭霸戰」獎項
師傅Andy17歲開始跟隨意籍總廚學藝，曾服務於多間星級酒店和意式餐館，經驗豐富。佢最擅長烹煮各款南北意大利菜式，精心搜羅當地南部海鮮、北方肉類入饌，以及各式傳統意大利粉製作佳餚。
睇埋環境
睇路搵食
OlivaRistorante（26119974）
地址：荃灣廣場3樓343-345號舖
座位：約150個
營業時間：星期一至四11am-11pm星期五、六10am-5am
交通：荃灣地鐵站B出口，到下層小巴站乘301號專線小巴，在荃灣廣場旁的吉之島下車
人均消費：$80-$300
