連勾兩幅地皮嘅嘉華國際，拍賣前，主席呂志和（圖）被問到有冇信心擊敗其他發展商時咁樣回應，「我梗係想攞到，我希望唔好咁高價」，仲話「信心梗係有，（信心）唔大我都唔嚟啦」。不過，市場擔心嘉華面對強敵環伺，成交價會被搶高，想攞地都唔係咁易，呂志和入場前都坦言「我都驚攞唔到」，點知就係咁唔好彩，畀佢一語成讖，嘉華最後空手而回，一幅地都攞唔到，出錢勾地最後俾人攞咗，成為輸家。
唔知大家覺唔覺得，拍賣結果有啲熟口熟面？04年5月嘉華都試過連勾兩幅地，結果馬鞍山幅地俾長實搶咗，變成今日嘅嵐岸，嘉華搶番幅大圍銅鑼灣山路地皮，即係今日嘅嘉御山，總算攞番些少顏面。今次，嘉華又係先失第一幅九龍塘地，但今次投馬鞍山就明顯放軟手腳，去到第17口價即係30.4億就停手，結果又俾長實再做「程咬金」，攞咗馬鞍山幅地。上次保住顏面只用咗8.65億，今次要成30幾億，計落又真係好鬼貴嘅！
至於嘉華嘅真正心頭好九龍塘地，小記又聽到啲傳聞，話說呂志和同信和黃志祥坐埋一齊，本來一早傾好要合作發展，嘉華負責舉18號牌，去到第42口價即係18.7億，嘉華飛紙仔畀信和話唔玩。信和諗過度過，決定自己出手舉番，結果8號牌中途殺出，仲拎埋幅地㖭！究竟兩人有冇夾過，就真係天曉得嘞。