臨近年尾，差唔多係時候到各大行出報告，講吓點睇豬年股市同樓市。人人嘅講法都差唔多嘅情況下，一定要講得出位，唔係真係搵鬼睇！好似瑞信咁，上個星期就寫咗個關於明年樓市的預測，題目係《ZappyNewYear》……其實都唔算預測，因為佢係話每年樓市表現，同年底競投出年農曆年年宵攤位嘅價格成績掛鈎，仲話樓價同年宵攤位競投成績成正比（見附圖），喺咪有參考價值？
今年攤位作價高
咁實情講啲乜？瑞信話，一年前佢哋已經講過，維園個年宵攤位競投價同樓市係一齊郁嘅，撇開經濟復蘇同失業率下降，舊年每個檔攤個平均價係跌咗32個巴仙，去到9364蚊，個樓市就由05年個高位跌咗5%。
今年年宵攤位競投剛剛結束，平均每個攤位作價係升咗38個巴仙去到12912蚊，而最貴個亁貨檔攤就由一個雞蛋仔（Phoenixcookies）老闆用5萬蚊投得，根據餅舖老闆講每磅餅賣28蚊計，佢就要賣超過7萬塊雞蛋仔，或者最少每日每10秒賣一「底」，先夠冚番舖租條數。
咁又睇番𠵱家個大環境，經濟復蘇、打工仔有人工加、失業率又有改善，大家出年係咪又應該將呢兩樣嘢一齊睇呢……就係咁，瑞信班分析員又交咗份功課……真係有深度！
[email protected]
